O PP afea a actitude “arrogante e déspota” de Tomé por negarse a tratar de negociar co CRAEGA para evitar que marche de Monforte

Monforte, 27 de marzo de 2024. Os populares afean a actitude “arrogante e déspota” de José Tomé en relación ás negociacións co Consello Regulador da Agricultura Ecolóxica de Galicia (CRAEGA) para intentar evitar que traslade fóra da cidade a súa sede principal.

“Tanto no pleno do Concello coma no da Deputación de Lugo deixou clara a súa negativa a contactar cos responsables deste órgano”; polo que Katy Varela considera que “está a poñer o seu orgullo persoal por riba do beneficio para a cidade”, lamenta a portavoz do PP local, Katy Varela.

“Cremos que, como alcalde, debería intentar mediar ou, polo menos, intentar falar cos responsables do CRAEGA. Pero demostrou a súa falta de vontade por tratar de evitar que este órgano abandone o noso municipio votando en contra da nosa proposta para que o Concello levara a cabo as actuacións necesarias para manter a sede en Monforte”, engade. A iniciativa saíu aprobada cos votos a favor de tódolos grupos da oposición e o voto en contra do goberno.

Dende o Grupo do PP na Deputación de Lugo propuxeron no pleno provincial unha alternativa concreta: que iniciase as negociacións para ceder ao CRAEGA as dependencias e terreos actualmente en desuso no Pazo de Tor que é de titularidade provincial. “Pero PSOE e BNG votaron en contra. E tras darse un empate na votación foi José Tomé, co seu voto de calidade como presidente, o que rexeitou esta proposta”, explican os populares. Esta iniciativa constitúe unha alternativa que o propio Consello Regulador ve con bos ollos e que, incluso, “xa propuxera o anterior goberno provincial tamén cun presidente do PSOE, pero que, coa chegada de Tomé á presidencia da Deputación, quedou en nada”, subliñan.

O portavoz do PP provincial, Antonio Ameijide, condena que, “por un capricho de José Tomé, Monforte deixe de ser a sede dun órgano cun ámbito de actuación a nivel autonómico que xera unha vintena de empregos na zona sur da provincia onde viven os seus traballadores”.

VONTADE DE COLABORACIÓN DO PP E DA CONSELLERÍA

“A pesar de que o CRAEGA é un órgano independente que decide libremente onde instalar a súa sede, o PP de Monforte quere que se quede aquí”, subliña Varela. Nese sentido, manifesta que “mentres o PP puxo todo da súa parte dende as distintas institucións, Tomé e o PSOE nin sequera son capaces de falar e intentar negociar”.

Tamén dende a consellería amosaron publicamente a súa vontade de colaboración coincidindo coa vista visita do conselleiro de Medio Rural ao Centro de Formación e Experimentación Agroforestal (CFEA) de Monforte o pasado venres 15 de marzo. A este respecto, a popular aclara que “Tomé dixo que non fora invitado, pero si que recibiu invitación. Incluso desculpou a súa non asistencia agradecendo a invitación”, conclúe.